माझा कान्हा

तिन्ही सांज झाली आता

सांज दिवा लागे दारी

वाट पहाते यशोदा

येरे कान्हा लवकरी ||

झाली झाली चांद रात

गोवत्से आली दारात

माझा कान्हा का दिसेना

हूर हूर अंतरात ||

माझा कान्हा का न येइ

परतले सवंगडी

कुणी पहिला का हरी

साद घाली माय वेडी ||

वेणूनाद ऐकुनिया

माय धावे वाटेवरी

चाहूल मला लागली

आला माझा हो मुरारी ||

धावुनिया कान्हा येई

येई मायेच्या कुशीत

वात्सल्य ते पाहुनिया

धन्य झाला आसमंत ||

बिलगूनी कान्हा बोले

आई चल ना घरात

जेऊ घाल मज आई

क्षुधा लागली बहुत ||

पाट ताट मांडूनिया

तुझीच वाट पहाते

चल कान्हा लवकरी

तुला जेऊ मी घालते ||

पक्वान्नेही सेवुनिया

सेवी मधू नवनीत

प्रेम पान्हा पिउनिया

नंदलाला झाला तृप्त ||

सारी सृष्टी हि निजली

तू हि कान्हा झोपी जाई

घेई पापण्या मिटुनी

यशोदा गाते अंगाई ||

अर्थ -नवनीत -दूध

क्षुधा -भूक

सवंगडी -मित्र

सेवी -सेवन करणे