छायेत तुझ्या होतो तेव्हा

निश्चिंत बागडत होतो मी

विसरलो जेव्हा तुला कृष्णा

भवनदीत कोसळलो मी ॥

विसंगती घडली मजला

झालो आंधळा बहिरा मी

ऐकू कसे तव नाम कृष्णा

शोधू कुठे तुला मी ॥

दमलो फिरूनी सारी सृष्टी

कुजलो या संसारी मी

कुठे अससी सांग कृष्णा

एकदाच तुला पाहीन मी ॥

शोध घेता घेता तुझा

भांबावून पुरता गेलो मी

खूण ती मज दाव कृष्णा

ओळख पटवून घेईन मी ॥

मायेच्या या सागरामध्ये

आहे गटांगळ्या खातो मी

हात तुझा दे ना कृष्णा

नेशील तिकडे येतो मी ॥